Var að panta nýja búninga

Jæja drengir ég var að panta búninga og það eru 10 treyjur á leiðinni til okkar.  Þeir sem eiga eftir að fjárfesta í flottu búningunum geta látið mig vita hvaða númer þeir vilja fá (í kommenti hér fyrir neðan).  Þeir sem nú þegar eru komnir með treyju verða að láta vita ef þeirra nafn er ekki við númerið í leikmannaskránni hérna fyrir ofan

Treyja, stuttbuxur og sokkar á 5500   gerist ekki betra en þetta verð

TLC 3-4 Metró – karaktersigur

Margir höfðu orð á því að það vantaði sárlega pistil eftir seinasta leik, en hefð hefur myndast fyrir því að Baldur skrifi pistlana eftir leikina, enda atvinnupenni og klárar einn pistil á nokkrum mínútum.  Hann er úti á landi sem stendur og því fellur þetta verk á mig í dag.

En hvað um það.  Metrómenn öttu kappi við TLC á Ásvöllum í kvöld í úrvalsfótboltaveðri, blankalogn og skýjað.  Nokkrar breytingar urðu á liðinu frá seinasta leik, en byrjunarliðið var svona:
Sævar, Finnur Hjörvar og Viktor
Kiddi, Andri, Njörður og Haffi Haff
Freyr
Halldór

Á bekknum voru: Árni, Ásgeir, Haffi, Ottó, Skúli, Víðir
Einnig sáust á hliðarlínunni sjaldséðir fuglar, sem mættu endilega láta sjá sig oftar, Danni og Hnikarr.

Við byrjuðum leikinn með miklum látum og skemmst frá því að segja að TLC vissu ekkert í hvorn fótinn þeir ættu að stíga fyrstu 15-20 mínúturnar.  Eftir um 10 mínútna leik pressaði Halldór á varnarmann TLC sem kixaði og fékk boltann í höndina, óviljandi en hafði mjög líklega áhrif á leikinn og því réttilega dæmd vítaspyrna, sem Halldór skoraði svo sjálfur úr.  Fleiri færi litu dagsins ljós en inn vildi boltinn ekki.  TLC náðu síðan að komast inn í leikinn, en fengu þó lítið af hættulegum færum, þá helst úr nokkrum aukaspyrnum fyrir utan teig sem ekkert varð úr.
Síðari hluta fyrri hálfleiks náði TLC að jafna leikinn eftir varnarmistök, þar sem Sævar hafði unnið boltann en gaf síðan of stutta sendingu á Hjörvar sem TLC-liðar komust inn í, og endaði með marki.
Jafnræði var með liðunum fram að hálfleik og voru það hálfleikstölur, 1-1.

Seinni hálfleikur byrjaði nokkurn veginn eins og sá fyrri endaði, bæði lið fengu nokkur færi, en TLC höfðu samt tekið stjórnina á leiknum.  Um miðjan seinni hálfleik náðu TLC-liðar sókn þar sem að framherji þeirra fékk að rekja boltann nánast að vild upp völlinn þar til hann kom sér í skotfæri rétt við vítateiginn og setti boltann örugglega niður í vinstra hornið.  Við markið kom smá panikk á okkur og ekki tók nema örfáar mínútur fyrir TLC að bæta við þriðja markinu.
TLC hafði síðan stjórn á leiknum þar til um 5-10 mínútur voru eftir, en þá var komið að þætti Kidda og Halldórs, þar sem þeir nánast einsamir drógu fleyið í land.  Gústi greip boltann eftir fyrirgjöf, kom honum á Árna sem rak hann upp völlinn og kom honum í hornið. Þaðan kom boltinn á Andra, sem gaf hælsendingu í gegnum klobbann á varnarmanni TLC á Kidda, sem skoraði örugglega og minnkaði muninn í 3-2.  Örfáum mínútum síðar jafnar Halldór eftir að hafa fengið boltann rétt fyrir framan miðju og fer í gegnum 2-3 varnarmenn áður en hann skorar, einstaklingsframtak af bestu gerð.  Í næstu sókn á eftir sýnir Kiddi annað eins einstaklingsframtak, fær boltann vinstra megin á vellinum, snýr af sér varnarmanninn með miklum krafti og leggur boltann í fjær þar sem hann skoppar í stöngina og inn, og þar með lauk leik með hreint frábærum lokakafla.

Allt annað var að sjá liðið í dag heldur en í seinasta leik, mun meiri barátta og þó svo við fengum á okkur 3 mörk í kvöld, var vörnin mun betri.  Þó gæti þessi leikur reynst okkur dýrkeyptur þar sem 3 lágu í valnum, Andri, Hjörvar og Sævar og aðeins vika í næsta leik á móti Vængjum Júpiters.

3 menn báru af í þessum leik, en það voru Gústi, Halldór og Kiddi.  Þó svo að Gústi hafi fengið á sig 3 mörk, átti hann frábæran leik, og varði þónokkur skot þegar þeir voru í stöðunni 3-1 og kom í veg fyrir að þeir næðu að kafsigla okkur.  Núna er vonandi að við náum upp góðri stemningu aftur með þessum leik og stöndum okkur vel í sumar.

Áfram Metró!

Metró 3-4 Áreitni og næsti leikur á þriðjudaginn

Skemmst er frá því að segja að við töpuðum þessum leik. Eftir 0-0 hálfleik, fengum við á okkur 2 hræódýr mörk. Við náðum að jafna leikinn bara til að fá á okkur þriðja ódýra markið og jafna leikinn aftur, bara til að fá á okkur fjórða ódýra markið og tapa þar með leiknum.

Þannig má segja að vandamálið hjá okkur í þessum leik sem og öðrum leikjum, er ekki að skora mörk, heldur að fá á okkur allt of mörg mörk og hleypa andstæðingum okkar inn í leikina. Höfum í raun gert þetta seinustu 3 leiki, þó svo við náðum að klára leikina tvo á undan. Vonandi verður því viðsnúningur á því sem fyrst.

Nú verður bara að gyrða í brók, og næsti leikur er á þriðjudaginn á móti TLC. Við þurfum toppmætingu og helst sigur á móti þeim ætlum við okkur að berjast í efri hluta deildinarinn í sumar.

Meldið ykkur bæði inn og út.

Æfing og leikur

Æfing í kvöld klukkan 21:15 í Varmá. TILKYNNA SIG ÚT!
Leikur á morgun vs. Áreitni á Framvelli, mæting klukkan 20:00. TILKYNNA SIG ÚT!

Æfingin í kvöld

Margir afboðuðu sig í gær á æfinguna í kvöld, og því langar okkur að vita hverjir vilja fá bolta á fimmtudaginn í staðinn, væntanlega 21:15 í Varmá. ALLIR að melda sig, bæði inn og út, og það sem fyrst.

Markaveisla í bikarsigri

Metrómenn brutu blað í bikarsögu félagsins þegar liðið komst áfram úr fyrstu umferð, eftir frækilegan 4-2 sigur á FC Keppnis í kvöld. Aldrei áður hefur liðið komist upp úr fyrstu umferð.

Inná í kvöld byrjuðu Gústi – Andri, Ásgeir, Finnur, Haffi – Sævar, Gæi, Haffi, Guðni, Freyr – Bjammi.

Eftir um tíu mínútur komu Halldór og Kiddi inn fyrir Bjamma og Guðna, en þeir voru seinir fyrir.

Við byrjuðum leikinn ágætlega. Bjammi þreytti varnarmennina með öflugum hraðabreytingum (úr lulli í stopp) þannig að Halldór fékk svigrúm til að skora úr hjólhestaspyrnu stuttu eftir að hann kom inn á. Ég var reyndar beðinn að koma því til hans að vera ekki að sýna sig svona í leikjum. Við getum þetta allir. Markið kom eftir fyrirgjöf en áður hafði verið hornspyrna.

Fljótlega eftir fyrsta markið skoraði Kiddi laglegt mark með hnitmiðuðu skoti í fjærhornið, áður en Halldór skoraði þriðja markið með þrumufleyg fyrir utan teig. 3-0 í hálfleik og við máttum vel við una.

Í hálfleik ræddu menn um að halda áfram að spila okkar bolta og gefa ekki tommu eftir. Allra síst að við myndum hleypa þeim inn í leikinn. Það var eins og við manninn mælt. Ekki voru liðnar nema um 15 mínútur af síðari hálfleik þegar þeir voru komnir inn í leikinn, 3-2, og sóttu sannarlega í sig veðrið. Halldór Svavar braut þau veður hins vegar á bak aftur þegar hann skoraði fjórða og síðasta mark leiksins úr vítaspyrnu eftir að leikmaður þeirra handlék knöttinn innan teigs. Þar með fullkomnaði hann þrennuna og annar sigur liðsins í röð staðreynd.

Inná komu auk þeirra sem áður voru taldir; Viktor og Víðir og stóðu sig með prýði. Hjörvar, Njörður og Raggi eru meiddir.

Mér fannst við oft á tíðum gera okkur sjálfum erfitt fyrir. Bakverðirnir mættu stundum leita meira inn á miðjusvæðið með lága bolta í stað þess að senda erfiða bolta upp í horn. Við mættum stundum færa liðið hægar fram völlinn og nota til þess fleiri menn. Þannig verða hlaupin minni okkar megin og meiri ró færist yfir liðið. Við eigum ekki að hika við að spila boltanum til baka á miðjumennina eða varnarmennina. Þetta á jafnt við alla og er mín skoðun.

Þrátt fyrir að erfitt sé að ganga fram hjá Halldóri Svavari við val á manni leiksins, þá ætla ég að leyfa mér að útnefna Finn mann leiksins að þessu sinni. Finnur kom sterkur inn í miðvarðastöðuna í kvöld og lék allan leikinn. Hann lét vel finna fyrir sér og hleypti aldrei bolta og manni samtímis fram hjá sér. Finnur steig vart feilspor í leiknum og svaraði virkilega vel fyrir sig eftir langa setu á bekknum í síðasta leik. Þannig á þetta að vera. Ég vil einnig geta þess að Freyr barðist eins og ljón allan leikinn og hljóp sem þindarlaus væri.

Hef þetta ekki lengra að sinni.
Baldur

Skipuleg barátta skók sigur

Mættum Kærustunni hans Ara á miðvikudaginn í blíðskaparveðri í Kórnum. Inná byrjuðu Gústi – Haffi, Hjörvar, Ásgeir, Andri – Kobbi, Garðar, Njörður, Hafþór, Kiddi – Halldór.

Við byrjuðum, eins og yfirleitt áður, illa. Fengum á okkur mark strax eftir 5 mínútur eða svo. Man ekki glöggt hvernig það atvikaðist en við vorum allavega ekki nógu áræðnir.

Bættum okkur helling þegar leið á hálfleikinn. Mig minnir að við höfum verið 2-1 yfir í hálfleik með mörkum frá veikum Halldóri Svavari og Kidda. Gátum vel við það unað. Mikil barátta skilaði því.

Í síðari hálfleik lékum við mun betur, ef frá eru taldar síðustu 10 mínúturnar. Þeir fengu bara 1-2 færi í hálfleiknum en við þónokkur. Andri og Hafþór fengu til dæmis kjörin færi og Kiddi fékk eitt á móti markverði, líkt og Halldór. Það var svo Kiddi sem skoraði þriðja markið áður en þeir minnkuðu muninn í 3-2 þegar stutt var eftir. Þar við sat þrátt fyrir að örlað hafi á örvæntingu síðustu mínúturnar. Auk þeirra sem byrjuðu komu Raggi, Freyr, Finnur, Sævar og Viktor við sögu í leiknum, mis mikið.

Nýtt fyrirkomulag á þjálfaramálum og meiri barátta skilaði sigrinum að þessu sinni. Skúli stóð sig með prýði í stjórnuninni og menn verða greinilega að sýna getu sína á æfingum ef þeir ætla í byrjunarliðið hjá harðstjóranum. Það er vel.

Mér fannst liðið í heild leika vel. Hjörvar fór mikinn í vörninni og það er mikill styrkur af honum þar. Miðjan var öflug þegar leið á leikinn og framherjar sprækir. Mér fannst Kiddi bestur okkar manna í leiknum. Hann gerði fá mistök, var mikið í boltanum og hélt honum einkar vel. Þá var hann mjög duglegur að verjast einnig og skoraði tvö góð mörk. Hann var að mínu mati maður leiksins.

Næsti leikur er á mánudaginn en það verður bikarleikur. Hann ætlum við að vinna en það er nauðsynlegt að menn boði sig hér í leikinn. Látið vita hvort þið mætið eða ekki! Höldum sigurgöngunni áfram.

Baldur assistant.

Æfing, leikur og fleira.

Æfing í kvöld á gervigrasinu við Varmá, Mosfellsbæ, klukkan 21:15.
Leikur á morgun við Kærustuna hans Ara í Kórnum, klukkan 19:30.

Ég vil fá meldingu fyrir hvoru tveggja hér fyrir neðan sem fyrst.

Einnig er komið plan fyrir hálft sumarið.

03.6.2009 Metró – Elliði – Ásvellir klukkan 21:00 (Sælla minninga)
10.6.2009 Kærastan hans Ara – Metró – Kórinn klukkan 19:30
15.6.2009 BIKAR 22-liða: Fc Keppnis – Metró – Kórinn klukkan 19:30
24.6.2009 Metró – Áreitni – Framvöllur klukkan 20:30
30.6.2009 TLC – Metró – Ásvellir klukkan 21:00
08.7.2009 Metró – Vængir Júpíters – Framvöllur klukkan 20:30
15-16.7.2009 BIKAR 16-liða (ef við komumst áfram)

Hún var blaut, tuskan – umræður takk

Lékum gegn Elliða í kvöld í fínu veðri og góðum aðstæðum.

Inn á byrjuðu
Gústi,
Haffi, Hjörvar, Ásgeir, Sævar
Hafþór, Njörður, Freyr, Kobbi
Halldór og Kiddi

Seint í fyrri hálfleik komu svo Viktor inn á (lék í 50 mín), Finnur (45 mín).
Í hálfleik bað Freyr um skiptingu og Hafþór Atli kom út.
Þessir komu inn á í síðari hálfleik: Skúli (lék 10-15 mín), Andri (30 mín), Raggi (30 mín), Víðir (20 mín) Ottó (10-15 mín), Gummi (ca. 10 mín).
Nítján fengu að spreyta sig í kvöld, af þeim tuttugu sem mættu klæddir.

Fyrri hálfleikur var ágætur af okkar hálfu. Við vorum mjög óheppnir að skora ekki. Kiddi átti hörku skalla í slá og átti auk þess eitt færi einn á móti markmanni. Hjörvar átti góðan skalla sem fór naumlega framhjá. Ásgeir gerði ein slæm mistök snemma leiks sem kostuðu mark en annars áttu þeir varla skot að marki, þó nokkrum sinnum hafi skapast hætta okkar megin vegna slæmra sendinga úr vörninni og útsparka. Við sóttum í okkur veðrið eftir því sem leið á hálfleikinn en tókst ekki að skora þrátt fyrir nokkur ákjósanleg færi.

Eftir um tíu mínútna leik í síðari hálfleik fengum við á okkur annað mark. Ég man ekki hvernig það atvikaðist en í kjölfarið var úr okkur allur vindur. Eflaust má að hluta til rekja það til ótímabærra skiptinga en mér var falið það hlutverk að skipta mönnum inn á í leiknum. Við það naut ég aðstoðar Skúla og fleiri eftir atvikum.
Leikurinn endaði 5-0. Það gefur ef til vill rétta mynd af síðasta hálftímanum en ekki fyrstu 50 mínútunum, en við vorum beinlínis óheppnir að vera undir í hálfleik.

ÓÁNÆGJA EFTIR LEIK
Eftir leikinn ræddu menn saman inn í klefa og voru ósáttir. Menn voru ósáttir við að nýir leikmenn, sem menn vissu vart hvað hétu, kæmu inn og spiluðu í fyrsta leik. Það tek ég á mig, þar sem ég reyndi að haga skiptingum þannig að flestir fengju einhverjar mínútur. Þær raddir voru háværar inn í klefa að við yrðum að gera það upp við okkur hvort við vildum spila á besta mögulega liðinu hverju sinni, eða spila þannig að sem flestir fái að spreyta sig. Hjá þeim 10-15 mönnum sem voru inn í klefa eftir leik vildu flestir þeir sem tóku til máls að besta liðið yrði ávallt inn á vellinum. Lykilmenn kæmu ef til vill út til að hvíla sig í fáeinar mínútur, en yrðu svo settir aftur inn hið fyrsta. Mér heyrðist meirihluti vera fyrir því fyrirkomulagi en veit þó að menn sem eru á öndverðum meiði héldu sig til hlés í klefanum.

Menn virtust sammála um að rangar ákvarðanir í skiptingum hafi orðið til þess að leikurinn tapaðist með þessum mun. Ég tek það alfarið á mig. Ég ítreka það hins vegar sem ég sagði í klefanum að ég er ekkert æstur í að sjá um skiptingar, jafnvel þó ég sé ekki að spila. Ástæða þess að ég ákvað að mæta ekki í búning í kvöld er einföld. Ég sá að í hópnum voru nógu margir leikmenn sem eru í betra formi en ég, og eru því betur til þess fallnir að vera inn á vellinum. Ég mæti ekki klæddur nema þegar hópurinn er þunnur eða ég í þeim mun betra líkamlegu standi.

FYRIRKOMULAG Í LEIKJUM
Ég get hins vegar, eins og aðrir, tekið að mér að skipta EF ALLIR eru sáttir við verkaskiptingu og þann vilja, sem endurspeglaðist í máli manna eftir leik, að þeir sem vermi bekkinn þurfi að sætta sig við að koma ekki inn á, nema þeir sem eru í byrjunarliði þurfi hvíld.

Svo ég tali fyrir mig þá er það fyrirkomuleg mér að skapi. Ég vil til dæmis ekki koma sjálfur inn og vera dragbítur inni á vellinum. Ég vil að allt verði gert til að við vinnum sem flesta leiki, þó það þýði setu á bekknum leik eftir leik. Við munum sem hópur hafa gaman að sumrinu, ef metnaðurinn til að vinna leiki er til staðar. Annars er hætt við að betri menn í liðinu missi áhugann.  Ég vil til dæmis ekki sjá að menn eins og Halldór, Kiddi og Hjörvar séu teknir af velli nema þeir séu alveg búnir á því. Mér heyrist flestir á þeirri skoðun en á hitt ber að líta að í hópnum eru menn sem eru ekki sammála því. Þeir eru fleiri en einn eða tveir. Þess hluti verðum við að fá á hreint, strax í upphafi sumars.

Við þurfum líka að hafa í huga að mætingin hefur verið ákaflega misjöfn, bæði í vetur og undanfarin sumur. Þó 20 manns hafi mætt í kvöld er ekki hægt að gera ráð fyrir því í alla leiki. Ef við förum þá leið að spila ávallt á bestu 11 mönnunum, þá er hætt við að einhverjir gefist upp á að mæta. Það hefur verið þannig í öllum liðum sem ég hef spilað í. Þegar svo kemur að því lykilmenn forfallast, til dæmis vegna sumarleyfa, er hætt við að fáskipað verði í hópnum í leikjum. Ég kýs þó sjálfur að líta svo á að slíkir leikir séu tækifæri fyrir mig til að sanna mig. Ég hvet aðra, sem byrja ekki alltaf inná, til að tileinka sér það viðhorf.

SEGIÐ YKKAR SKOÐUN
Tuskan sem við fengum í andlitið í kvöld var blaut og köld. Það er hins vegar ekkert volæði framundan. Frábært sumar er að fara af stað og það er í okkar höndum að gera það skemmtilegt. Notum tuskuna til að skola af okkur vorskítinn. Ég hvet alla þá sem mættu í kvöld, auk þeirra sem mættu ekki, til að segja sína skoðun á þessum málum sem ég hef hér reifað. Verið hreinskilnir og látið sjónarmið ykkar uppi. Við þurfum skelegga umræðu, frá öllum í hópnum. Svarið því hvernig þið viljið hafa leikskipulagið, til dæmis hvort þeir sem mæti á æfingir eigi að spila mest, eða hinir, sem ef til vill eru betri leikmenn.

Fyrirkomulag æfinga ræðst í þessari viku. Á það verður allt kapp lagt. Flestir virtust á því að æfa á þriðjudögum, þar sem flestir aðrir virkir dagar eru leikdagar.

Kv. Baldur

Fimm dagar í fyrsta leik!

Leitt hvernig fór með æfingaleikinn í kvöld. Hefði verið gott að ná einum í viðbót fyrir mót. Það er nú komið í ljós að fyrsti leikurinn verður 3. júní klukkan 21.00 á Ásvöllum. Það er á miðvikudaginn næsta! Við mæstum liði Elliða í fyrsta leik. Það verður klárlega erfiður leikur.

Það er alveg spurning hvort við reynum ekki að finna okkur völl eða æfingasvæði til dæmis á mánudaginn, ef áhugi er fyrir því?
Við þurfum á öllum okkar mönnum að halda í fyrsta leikinn. Endilega látið vita sem allra fyrst hvort þið komist í hann. Tímabilið er að hefjast og það væri gaman að byrja á einum sætum sigri !!!

Meldið ykkur.
Áfram Metró,
Baldur

 

3.júni.21.00 Metró vs Elliði Ásvellir